មិលិន្ទប្បញ្ហា ភាគ១/កថាផ្សេងៗ

ប្រភពកកើតនៃមិលិន្ទប្បញ្ហា

សេចក្តីប្រាថ្នារបស់ព្រះចៅមិលិន្ទ្រាធិរាជ កាលនៅជាសាមណេរ ក្នុងអតីតកាល

លើកទី ១ ៖“ ដោយកម្មដែលជាបុណ្យគឺការចោលសំរាមនេះអំណឹះកាលតទៅ( កន្លងផុតទៅ ) រហូតដល់យើងសម្រេចនិព្វានសូមឱ្យយើងជាមនុស្សមានយសសក្តិខ្ពង់ខ្ពស់មានតេជះខ្លាំងដូចព្រះអាទិត្យពេលថ្ងៃត្រង់នៅគ្រប់ទីកន្លែងដែលយើងកើតផងចុះ”។
លើកទី២ ៖“ ក្នុងរវាងពេលរហូតតទៅទម្រាំយើងបានសម្រេចព្រះនិព្វាននេះសូមឱ្យយើងជាមនុស្សមានបដិភាណកើតមានភ្លាមមានបដិភាណមិនចេះចប់ដូចទឹករលកនៅគ្រប់ទីកន្លែង ដែលយើងកើតផងចុះ ” ។

សេចក្តីប្រាថ្នារបស់ព្រះនាគសេនត្ថេរ ក្នុងអតីតកាល

“ក្នុងរវាងពេលរហូតដល់យើងសម្រេចព្រះនិព្វាននេះសូមឱ្យយើងជាមនុស្សមានបដិភាណមិនចេះចប់ដូចទឹករលកក្នុងទន្លេគង្គានេះផងចុះ សូមឱ្យយើងជាអ្នកដែលអាចដោះស្រាយបញ្ហាបដិភាណដែលសាមណេរនេះចោទសួរគ្រប់យ៉ាងផងចុះ ” ។

សេចក្តីព្យាករណ៍របស់ព្រះសម្មាសម្ពុទ្ធ

“បុគ្គលទាំង២នេះនឹងឧប្បត្តិឡើងដូចព្រះមោគ្គល្លីបុត្តត្ថេរឧប្បត្តិឡើងដូចនោះដែរនៅពេលកន្លងទៅអស់៥០០ឆ្នាំ ចាប់ពីពេលបរិនិព្វានរបស់តថាគត បុគ្គលទាំង២នេះ នឹងឧប្បត្តិឡើង បុគ្គលទាំង២នេះ នឹងបែងចែកធម៌និងវិន័យ ដែលតថាគតសម្តែងទុកយ៉ាងសុខុមឱ្យអស់ភាពស្មុគស្មាញ ឱ្យអស់ចំណុចមន្ទិលដោយអំណាចនៃសំណួរឧបមានិងយុត្តិក្នុងបញ្ហា “ ។

ក្រុមការងារធម្មទានមិលិន្ទប្បញ្ហាភាគ១

បោះពុម្ពលើកទី២ - ព.ស. ២៥៥៨

រៀបរៀងជាខេមរភាសា	៖- ឧបាសិកា វណ្ណារី - ទេពប្រណម្យ(Amara Tevy )
វាយអត្ថបទ និងរចនាទំព័រ	៖- ឧបាសិកា វណ្ណារី - ទេពប្រណម្យ ( អមរាទេវី )
កែអក្ខរាវិរុទ្ធ	៖-ភិក្ខុ ធម្មសិរី សែម - ចន្ទធីរ៍ ( អនុបណ្ឌិត )
	- ភិក្ខុ សច្ចធនោ ជាង - វណ្ណារ៉ា ( សាស្ត្រាចារ្យ)
	- ព្រឹទ្ធាចារ្យ ដាំ - កុយ ( សមាជិកសមាគមអភិរក្ស-និងអភិវឌ្ឍន៍អក្សរសាស្រ្តខ្មែរ )
សម្របសម្រួលធម្មទាន	៖
ភិក្ខុ ធម្មប្បញ្ញោ ស៊ឹម -សំអូន	ប្រធានពុទ្ធិកសមាគមសមណនិស្សិតកម្ពុជា-ស្រីលង្កា
ព្រះមហា យសបាលោ សុខ - សុវណ្ណ	អនុគណក្រុងពោធិសាត់
ភិក្ខុ ធម្មសិរី សែម - ចន្ទធីរ៍	ប្រធានផ្នែកអប់រំនិងផ្សព្វផ្សាយ
	នៃពុទ្ធិកសមាគមសមណនិស្សិតកម្ពុជា-ស្រីលង្កា
	គង់នៅវត្តធិតាពុទ្ធិការាម រដ្ឋអារីហ្សូណាU.S.A
ភិក្ខុ តបរតោ ដៀង- ស៊ីថុល	ប្រធានផ្នែកទំនាក់ទំនង នៃពុទ្ធិកសមាគមសមណ
	និស្សិតកម្ពុជា-ស្រីលង្កា សាខាខេត្តពោធិសាត់
	និងជាលេខាធិការគណពោធិសាត់
ភិក្ខុ សន្តិបាលោ សំ - សារ៉ូន	អនុប្រធានផ្នែកអប់រំ
	នៃពុទ្ធិកសមាគមសមណនិស្សិតកម្ពុជា-ស្រីលង្កា
ភិក្ខុ សច្ចធនោ ជាង - វណ្ណារ៉ា	ព្រះគ្រូសូធ្យស្តាំ វត្តគោកខ្សាច់ ខណ្ឌពោធិសែនជ័យ
	និងជាសាស្ត្រាចារ្យពុទ្ធិកវិទ្យាល័យជម្ពូវ័នសែនជ័យ
	ខណ្ឌពោធិសែនជ័យភ្នំពេញ
ភិក្ខុ បញ្ញាវរោ សន - សែន	វត្តជម្ពូវ័ន ខណ្ឌពោធិសែនជ័យ ភ្នំពេញ
ភិក្ខុ ចិត្តបាលោ ឈួន - សីហា	វត្តវេឡុវនារាម(ព្រៃឫស្សី)ខណ្ឌពោធិសែនជ័យ ភ្នំពេញ
ភិក្ខុ ចន្ទមង្គលោ ឈន - ស៊ាងហោ	វត្តលង្កា ខណ្ឌចំការមន ភ្នំពេញ
ភិក្ខុ ចន្ទសេនា សិម - សុឈុំ	វត្តមង្គលវ័ន ខណ្ឌ ៧ មករា ភ្នំពេញ
ភិក្ខុ វឌ្ឍនោ វង្ស - វុឌ្ឍី	វត្តសំពៅមាស ខណ្ឌ ៧ មករា ភ្នំពេញ
ភិក្ខុ សមថមុនី រឿន - គឹមស្រេង	វត្តឧត្តរាវតី ខណ្ឌឫស្សីកែវ ភ្នំពេញ
ភិក្ខុ វិរិយធម្មោ សំ - ទីហួរ	វត្តឥន្ទញ្ញាណ ក្រុងព្រះសីហនុ
ភិក្ខុ ធម្មត្ថេរោ មួង - ចន្ថា	វត្តកៀនស្វាយក្រៅ ខេត្តកណ្តាល
ភិក្ខុ បញ្ញាបជ្ជោតា វ៉ាន់ - សុខ	វត្តខេមវ័ន ខេត្តកំពង់ចាម
សាមណេរ សុមន សុខ - ធាវី	វត្តមហាមន្ត្រី ភ្នំពេញ
សាមណេរ ឡុង - សុផាត	វត្តឧត្តមមុនីរតនារាម អូរតាថុក ខេត្តកំពង់ចាម
ព្រឹទ្ធាចារ្យ ដាំ - កុយ	សមាជិកសមាគមអភិរក្សនិងអភិវឌ្ឍន៍អក្សរសាស្រ្តខ្មែរ
ឧបាសិកា វណ្ណារី - ទេពប្រណម្យ	ក្រុមសាកច្ឆាធម៌ផ្សារដេប៉ូ ភ្នំពេញ និង
	ទំព័រចំណេះដឹងព្រះពុទ្ធសាសនាBuddhism Knowledge
ឧបាសក ជា - សុថាវី	អ្នកសិក្សាធម៌នៅវត្តសំពៅមាស និងវត្តឧណ្ណាលោម
ឧបាសក ម៉ម - សេង	អ្នកសិក្សាធម៌នៅវត្តសំពៅមាស និងវត្តឧណ្ណាលោម
ឧបាសិកា វ៉ែន - សុភាវតី	ស្រុកមង្គលបូរី ខេត្តបន្ទាយមានជ័យ

ទីប្រឹក្សា៖	- ព្រះគ្រូ អដ្ឋសិរិវិទេស មហា ថាណាត់ ( ព្រះធម្មទូតថៃ ប្រចាំសហរដ្ឋអាមេរិក )
	- ភិក្ខុ ព្រះមហាសុចិន្តា ធម្មសារោ ( បាលី ប្រយោគ ៩ ប្រទេសថៃ )
	- ភិក្ខុ ព្រះមហាសុវិទ្ទ - រតិន្ទយោ ( បាលី ប្រយោគ ៨ ប្រទេសថៃ )
	- ភិក្ខុ វជិរជាតោ នូ - សុជាតិ ភិក្ខុ ជោតិនន្ទ ( ផ្តល់ច្បាប់ដើម )
ការផ្សាយ ៖	ទំព័រចំណេះដឹងព្រះពុទ្ធសាសនាFb Page :Buddhism Knowledge
ទូរស័ព្ទទំនាក់ទំនង ៖	015-673 806
បណ្ណាល័យជាតិ ៖	ISBN - 978-99963-843-0-1
រក្សាសិទ្ធិគ្រប់យ៉ាង

អនុមោទនាកថា

មិលិន្ទប្បញ្ហា ជាបករណ៍ពិសេសមួយ ដែលអធិប្បាយសត្ថុសាសន៍ តាមរយៈបុច្ឆាវិសជ្ជនារបស់មហាគូសន្ទនាពីររូប គឺ ព្រះចៅមិលិន្ទ្រាធិរាជ Menandro ជាព្រះរាជាក្នុងអាណាចក្រក្រិកបុរាណ ដ៏ល្បីព្រះនាម ក្នុងសតវត្សរ៍ទី ១ មុនគ្រិស្ទ បានសាកសួរបញ្ហានឹង ព្រះមហានាគសេនត្ថេរ ជាព្រះអរហន្តបដិសម្ភិទា ដ៏ជាកំពូលវាទៈនាសម័យនោះ។

ក្រោយពីបានអានមួយចប់ ខ្ញុំបានកត់ត្រាទុកនូវពាក្យពេចន៍ និងអក្ខរាវិរុទ្ធមួយចំនួន ផ្ញើជូនទៅឧបាសិកា វណ្ណារី អ្នកប្រែគម្ពីរនេះ ដើម្បីប្រយោជន៍ដល់ការបោះពុម្ពលើកក្រោយទៀត ព្រោះគម្ពីរនេះជាគម្ពីរពិសេស និងមានប្រយោជន៍ច្រើនសម្រាប់អ្នកប្រាថ្នាសិក្សា ស្វែងយល់អំពីព្រះពុទ្ធសាសនា ។ ដោយបានឃើញកំណែរបស់ខ្ញុំ ឧបាសិកា វណ្ណារី ក៏រីករាយ ហើយបានសំណូមពរខ្ញុំ ឱ្យជួយពិនិត្យជាថ្មីម្តងទៀត សម្រាប់ការបោះពុម្ពលើកទីពីរនេះ។ ខ្ញុំក៏ឆ្លៀតពេលពិនិត្យម្តងទៀត រហូតដល់ចប់ ។ ការពិនិត្យនេះ មានផលលំបាកខ្លះៗ ក្នុងការស្វែងរកប្រភពពីព្រះត្រៃបិដកខ្មែរ តែការនេះ ជាការពេញចិត្តរបស់ខ្ញុំ រួមចំណែកផ្នែកបញ្ញាដ៏ថ្លាស្អាត ក្នុងបទនៃការប្រែគម្ពីរដ៏មានតម្លៃនេះ ។

ខ្ញុំសូមកោតសរសើរដោយស្មោះចំពោះវីរិយភាពដ៏ខ្លាំងក្លានេះ និងសូមប្រសិទ្ធិពរជូនឧបាសិកាឱ្យថ្លាគំនិតគិតសម្រេចរាល់គ្រប់កិច្ចការទាំងពួង ក្នុងការកសាងគម្ពីរបន្តទៀត និង បានជាបច្ច័យនៃការត្រាស់ដឹងទៅថ្ងៃមុខ ។

ម្យ៉ាងទៀត ខ្ញុំសូមលើកទឹកចិត្តឱ្យពុទ្ធបរិស័ទទាំងអស់ ទាំងបព្វជិតទាំងគ្រហស្ថអានសៀវភៅនេះឱ្យបានចប់សព្វគ្រប់ និងបន្តអាន មិនខកខានទាំងជួយឧបត្ថម្ភចំពោះការបោះពុម្ពភាគបន្ត ៗ ទៀតកុំបីខានឡើយ ។

សូមបានប្រសព្វនឹងបញ្ញាដ៏ប្រពៃគ្រប់ៗគ្នា !

ចិរំ តិដ្ឋតុ ជិនសាសនំ សូមសាសនាព្រះជិនស្រីតាំងនៅជាអង្វែងទៅហោង!

វត្តធិតាពុទ្ធិការាមរដ្ឋអារីហ្សូណាសហរដ្ឋអាមេរិក
ថ្ងៃអង្គារ ៨កើត ខែមាឃ ព.ស ២៥៥៨ គ.ស ២០១៥
ភិក្ខុ ធម្មសិរី សែម -ចន្ទធីរ៍
អនុបណ្ឌិតទស្សនវិជ្ជាពុទ្ធសាសនា

ទស្សនកថា

កាលខ្ញុំព្រះករុណា អាត្មាភាព បានអានសៀវភៅមិលិន្ទប្បញ្ហារបស់ព្រះគ្រូ វិមលប្បញ្ញា អ៊ុម - ស៊ូរ អាចារ្យនៅព្រះរាជបណ្ណាល័យកម្ពុជា ឃើញថាមានការជក់ចិត្តដិតអារម្មណ៍ ប៉ុន្ដែក៏មានបញ្ហាមួយចំនួនមិនយល់ដែរ ព្រោះជាភាសាបណ្ឌិតសន្ទនាគ្នាខៃជ្រៅទៅក្នុងន័យអភិធម្ម(គ្មានអដ្ឋកថាពន្យល់) ហើយនៅខាងចុងបញ្ចប់លោកបានសរសេរទុកថា បានប្រែតែ២ ស្ថាន(កណ្ឌទី១ កណ្ឌទី២)ប៉ុណ្ណោះ ដូច្នេះ៤ស្ថានទៀត (កណ្ឌទី៣ កណ្ឌទី៤ កណ្ឌទី៥ កណ្ឌទី៦ ) មិនបានប្រែនៅឡើយ ។

ប៉ុន្តែសៀវភៅដែលលោកអ្នកកំពុងកាន់នៅនឹងដៃនេះ ជាការរៀបរៀងបកប្រែមិលិន្ទ-ប្បញ្ហារបស់ភូមាដោយឧបាសិកា វណ្ណារី - ទេពប្រណម្យ ពិតជាអាចដោះស្រាយបញ្ហាទាំងអស់នោះបាន ព្រោះមានទាំងអដ្ឋកថា និងបានបកប្រែគ្រប់កណ្ឌ ( ៦ កណ្ឌ ) ដែលជាផ្នែកមួយដ៏សំខាន់សម្រាប់អ្នកសិក្សា ប្រៀបដូចជាជនដែលដើរផ្លូវឆ្ងាយ ហើយស្រេកទឹកបានជួបនូវទឹកជ្រោះដ៏ត្រជាក់ដូច្នោះដែរ។

សៀវភៅមិលិន្ទប្បញ្ហានេះ ជាគម្ពីរមួយដ៏ពិសិដ្ឋ អាចធ្វើឲ្យលោកអ្នកទទួលបាននូវប្រយោជន៍ដ៏ច្រើន ដែលមានលម្អ៤យ៉ាង គឺ៖ ១. ជាសំណួរចម្លើយ ដ៏ល្អឥតខ្ចោះ ២. ប្រើពាក្យលែបខាយល្អស្រស់ ៣. ជាការសន្ទនាធម៌គ្នាដ៏សែនមានន័យ មានរបៀបបំផុតរបស់អ្នកសន្ទនាធម៌ ៤. ជាការដោះស្រាយបញ្ហាប្រកបដោយហេតុផលស៊ីជម្រៅបំផុត នៅក្នុងព្រះពុទ្ធសាសនា ។

បើនរជនណាបានអានហើយ នរជននោះនឹងជាប់ចិត្តដិតអាម្មណ៍ នឹកស្ងើចសរសើរដល់អ្នករៀបរៀងចងក្រងដំបូង ដែលបន្សល់នូវគម្ពីរដ៏មានតម្លៃនេះ ទុកដល់អ្នកជំនាន់ក្រោយ មិនខាន ។

សៀវភៅជាថ្មសំលៀងនូវបញ្ញាដ៏មានប្រសិទ្ធភាព!!

សូមជនានុជនទទួលបាននូវបញ្ញា ដែលកើតឡើងពីការអាន ជម្រះចំណុចគួរឲ្យសង្ស័យនានា ក្នុងព្រះសាសនារបស់ព្រះសម្ពុទ្ធកុំបីខាន ។

វត្តគោកខ្សាច់ ថ្ងៃអង្គារ ១៥កើត ខែមាឃ ឆ្នាំមមីឆស័ក ព.ស. ២៥៥៨ ត្រូវនឹងថ្ងៃទី០៣ ខែ កុម្ភៈ គ.ស. ២០១៥
ភិក្ខុ សច្ចធនោ ជាង - វណ្ណារ៉ា
ព្រះគ្រូសូធ្យស្តាំ វត្តគោកខ្សាច់ និងជាសាស្រ្តាចារ្យពុទ្ធិកវិទ្យាល័យជម្ពូវ័នសែនជ័យ

អារម្ភកថា

មិលិន្ទប្បញ្ហាទាំង ២ ភាគ រៀបរៀងដោយ ព្រះគ្រូវិមលប្បញ្ញាអ៊ុម-ស៊ូរ អាចារ្យនៅព្រះរាជបណ្ណាល័យកម្ពុជាដែលបោះពុម្ពលើកទី ១ នៅឆ្នាំ១៩២៧ និងបោះពុម្ពលើកទី ៤ នៅឆ្នាំ ១៩៦៣ នាងខ្ញុំយល់ឃើញថា មានចំណុចខ្វះខាត ៣ យ៉ាង គឺ ៖

១. ពុំមានអដ្ឋកថាអធិប្បាយ ។

២. មានខ្លឹមសារស្រដៀងនឹងមិលិន្ទប្បញ្ហារបស់ថៃ (ខុសពីរបស់ភូមា)។

៣. មិនទាន់ចប់សព្វគ្រប់នៅឡើយ ដោយមានខ្លឹមសារត្រឹមតែ២កណ្ឌប៉ុណ្ណោះគឺបុព្វយោគកណ្ឌនិងមិលិន្ទប្បញ្ហាកណ្ឌ( ៧ វគ្គ ) ចំណែក ៤ កណ្ឌ ទៀតគឺលក្ខណប្បញ្ហាកណ្ឌ មេណ្ឌកប្បញ្ហាកណ្ឌ អនុមាណ- ប្បញ្ហាកណ្ឌ និង ឧបមកថាកណ្ឌ ពុំមានទេ ( របស់ភូមា មានទាំងអស់ដល់ទៅ ៦កណ្ឌ ) ។

ហេតុនេះ បន្ទាប់ពីបានអានមិលិន្ទប្បញ្ហារបស់ភូមា តាមរយៈស្នាដៃបកប្រែរបស់លោកគ្រូ ឆៃវឌ្ឍន៍ កបិលកាញ្ចន៍ (ជនជាតិថៃ) ដែលជាអ្នកជំនាញនូវព្រះត្រៃបិដក ជាអ្នកមានការយល់ដឹងច្រើនទាំងផ្នែកបរិយត្តិនិងប្រតិបត្តិ ទើបនាងខ្ញុំក្នុងនាមជាកុលធីតាខ្មែរមួយរូប ដែលជ្រះថ្លាពេញចិត្តនឹងការស្រាវជ្រាវព្រះធម៌របស់ព្រះសម្មាសម្ពុទ្ធឃើញភាពចាំបាច់ក្នុងការបកប្រែមិលិន្ទប្បញ្ហារបស់ភូមាតាមរយៈស្នាដៃរបស់លោកគ្រូឆៃវឌ្ឍន៍ ដោយរៀបរៀងជាខេមរភាសា ដើម្បីឲ្យប្រិយមិត្តអ្នកអានខ្មែរបានទទួលអត្ថ-រស និង អត្ថន័យនៃមិលិន្ទប្បញ្ហារបស់បរទេសម្តង (របស់ភូមាគឺ ដូចគ្នាទៅនឹងរបស់ស្រីលង្កានិងរបស់អឺរ៉ុប ) ព្រោះមិលិន្ទប្បញ្ហារបស់ភូមា មានដល់ទៅ ៦ កណ្ឌ និងមាន អដ្ឋកថា ជាសេចក្តីអធិប្បាយភ្ជាប់ទៅនឹងបញ្ហានីមួយៗ ដើម្បីងាយស្រួល ក្នុងការយល់ខ្លឹមសារសេចក្តី ឱ្យបានត្រឹមត្រូវ ដែលពុំមានក្នុង មិលិន្ទប្បញ្ហារបស់ខ្មែរនិងថៃ ។

ទើបនាងខ្ញុំបានតាំងចិត្តថា នឹងបកប្រែមិលិន្ទប្បញ្ហា ឲ្យបានចប់សព្វគ្រប់ ទាំង ៦ កណ្ឌ ដើម្បីទុកជាមរតកវប្បធម៌អក្សរសាស្ត្រខ្មែរ ផ្នែកព្រះពុទ្ធសាសនា សម្រាប់កូនខ្មែរជំនាន់ក្រោយ ទៅតាមកម្លាំងបញ្ញារបស់ខ្លួន មុននឹងជីវិតនេះស្លាប់ទៅ ។

ដោយសារមានកម្រាស់ក្រាស់ពេក សៀវភៅមិលិន្ទប្បញ្ហាត្រូវបានបែងរំលែកជា ៣ ភាគ សម្រាប់ ៦ កណ្ឌនោះ ដើម្បីងាយស្រួលចាប់កាន់អាន ដោយមួយភាគមានខ្លឹមសារចំនួន ២ កណ្ឌគឺ ៖

ភាគ ១៖	កណ្ឌទី ១ - បុព្វយោគកណ្ឌ ( ប្រវត្តិរបស់បុគ្គលទាំង ២ )
	កណ្ឌទី ២ - មិលិន្ទប្បញ្ហាកណ្ឌ ( ៧ វគ្គ )
ភាគ ២៖	កណ្ឌទី ៣ -លក្ខណប្បញ្ហាកណ្ឌ ( ៦ បញ្ហា )
	កណ្ឌទី ៤ -មេណ្ឌកប្បញ្ហាកណ្ឌ ( ៥ វគ្គ )
ភាគ ៣៖	កណ្ឌទី ៥ -អនុមាណប្បញ្ហាកណ្ឌ ( ៤ វគ្គ )
	កណ្ឌទី ៦ -ឧបមកថាកណ្ឌ( ៧ វគ្គ )

ដូច្នេះសូមអ្នកសិក្សាធម៌រង់ចាំអានជាបន្តទៀតកុំបីខាន ដើម្បីបណ្តុះ នូវពន្លឺនៃបញ្ញារបស់ខ្លួនទាក់ទងនឹងបញ្ហាចម្ងល់ផ្សេង ៗ ក្នុងព្រះពុទ្ធសាសនា ដែលកំពូលអ្នកប្រាជ្ញទាំងពីរបានបុច្ឆាវិសជ្ជនាសួរឆ្លើយគ្នា ដើម្បីស្រាយបំភ្លឺនូវចម្ងល់ទាំងនោះទុកជាមាគ៌ាដោះស្រាយបញ្ហា សម្រាប់ពុទ្ធសាសនិកជនជំនាន់ក្រោយបានជម្រះនូវមន្ទិលទាំងឡាយ ពាក់ព័ន្ធនឹងព្រះពុទ្ធសាសនាសាងនូវភាពភ្លឺថ្លានៃព្រះសាសនាដ៏ឧត្តមដើម្បីជាហេតុជា បច្ច័យធ្វើទីពឹងសម្រាប់ខ្លួនក្នុងព្រះសាសនានេះ តទៅថ្ងៃអនាគតកុំបីខាន។

ទន្ទឹមនឹងនោះ នាងខ្ញុំសូមថ្លែងអំណរគុណយ៉ាងជ្រាលជ្រៅចំពោះព្រះភិក្ខុ ធម្មសិរីសែម - ចន្ទធីរ៍ អនុបណ្ឌិតទស្សនវិជ្ជាព្រះពុទ្ធសាសនា ពីស្រីលង្កា គង់នៅវត្តធិតាពុទ្ធិការាម រដ្ឋអារីហ្សូណា សហរដ្ឋអាមេរិក, ព្រះភិក្ខុ សច្ចធនោជាង - វណ្ណារ៉ាព្រះគ្រូសូធ្យស្តាំវត្តគោកខ្សាច់ និងជាសាស្រ្តាចារ្យពុទ្ធិកវិទ្យាល័យជម្ពូវ័នសែនជ័យ ខណ្ឌពោធិសែនជ័យ រាជធានីភ្នំពេញ និង ព្រឹទ្ធាចារ្យ ដាំ-កុយ សមាជិកគណៈកម្មការសមាគមអភិរក្សនិងអភិវឌ្ឍន៍អក្សរសាស្ត្រខ្មែរដែលបានជួយកែសម្រួលអក្ខរាវិរុទ្ធសម្រាប់ការបោះពុម្ពលើកទី ២ នេះ ។

ទោះបីជាយ៉ាងនេះក្តី សៀវភៅមិលិន្ទប្បញ្ហាភាគ ១ នេះប្រាកដជានៅមានចំណុចខ្វះខាតខ្លះ ៗ ដោយអចេតនា ជាក់ជាមិនខានដែលនាងខ្ញុំសូមលំឱនកាយសូមការអធ្យាស្រ័យពីចម្ងាយ និងរីករាយទទួលយកការរិះគន់ផ្សេងៗ ពីសម្នាក់មិត្តអ្នកអានទូទៅ ។

នាងខ្ញុំសង្ឃឹមយ៉ាងមុតមាំថា សៀវភៅមិលិន្ទប្បញ្ហានេះនឹងនាំមកនូវប្រយោជន៍ជាមហិមាចំពោះអ្នកសិក្សាធម៌ដើម្បីបានស្វែងយល់អំពីព្រះពុទ្ធសាសនាឲ្យបានច្រើនថែមទៀត និងជាមរតកសម្រាប់កូនខ្មែរជំនាន់ក្រោយឲ្យងាយស្រួលសិក្សាស្រាវជ្រាវផងដែរ ។

សូមអានិសង្សនៃការបកប្រែរៀបរៀងសៀវភៅនេះ ជួយឱ្យប្រិយមិត្តអ្នកអាន និង អ្នកសិក្សាធម៌ ជួបប្រទះតែនឹងសេចក្តីសុខ សេចក្តីចម្រើនក្នុងព្រះពុទ្ធសាសនាតរៀងទៅ រហូតបានជាក់ច្បាស់នូវព្រះនិព្វានដោយបញ្ញារបស់ខ្លួន គ្រប់ ៗ រូប កុំបីខាន ៕

រាជធានីភ្នំពេញថ្ងៃ ១២កើត ខែបុស្ស ឆ្នាំមមី ព.ស. ២៥៥៨ ត្រូវនឹងថ្ងៃទី ១ ខែ មករា ឆ្នាំ ២០១៥

អមរា ទេវី

ឧបាសិកា វណ្ណារី ទេពប្រណម្យ
vannary.t@gmail.com
អតីតដូនជីសិក្សាព្រះអភិធម្មត្ថសង្គហៈ ៩ បរិច្ឆេទ
វិសុទ្ធិមគ្គ ធម្មសង្គណី មហា-បដ្ឋាន ព្រះសូត្រ
និងមិលិន្ទប្បញ្ហានៅព្រះរាជាណាចក្រថៃ ។

ទំព័រមុន:មិលិន្ទប្បញ្ហា ភាគ១

ទំព័របន្ទាប់:អត្ថាធិប្បាយ